ՓՈՔՐԻԿ ՀԱՅՐԵՆԱԿԻՑ
«Փոքրիկ Հայրենակից» 2023
(համառոտ նկարագրություն)
Մեր հայրենիքում ու առավելապես նաև սահմանամերձ մարզերում ապրում են փոքրիկներ, ովքեր խոցելի կարգավիճակ ունեն և զգում են մեր հոգածության կարիքը։ Նրանց առօրյան ամառային արձակուրդների օրերին դրական լիցքերով հավելելու գործում նշանակալի դեր կարող են խաղալ կրթադաստիարակչական ծրագրերը։ Առավել ևս, երբ այդ ծրագրերի միջոցով հնարավոր է լինում երեխային մոտեցնել հայ և համաշխարհային արվեստին՝ այդ կերպ սերմանելով նրանցում հայրենասիրություն և սեր դեպի մշակույթը։ Նման ծրագրերի միջոցով հնարավոր կլինի որոշակիորեն նպաստել ոչ միայն փոքրիկների կենսակերպում դրական փոփոխությունների ներդրմանը, այլ նաև մարզային դաշտում ոլորտային մասնագետների սոցիալական վիճակում դրական հավելումներին։ Ուստի, կարևորում ենք մեր մասնակցությունը ՀՀ սահմանամերձ, ինչպես նաև 1988 թ․ երկրաշարժի գոտու մարզերի 3-9-րդ դասարաններում սովորող երեխաների կրթադաստիարակչական բնույթի ծրագրերի իրականացման գործում։ Այս նպատակով «Նոր Նախիջևան» մարդասիրական հիմնադրամը (այսուհետ՝ հիմնադրամ) հարկ է համարում որոշ բնակավայրերի 3-9-րդ դասարաններում սովորող և հիմնադրամի համար հստակեցված կարգավիճակ ունեցող երեխաների համար կազմակերպել «Փոքրիկ հայրենակից» ծրագիրը։ Արդյունքում, ծրագրին մասնակցող երեխաների համար հնարավոր կլինի ապահովել արժեքավոր գիտելիքներով և հմտություններով հագեցած հետաքրքիր օրեր։
Ովքե՞ր կարող են մասնակցել։
Ծրագրի մասնակիցների շրջանակը նախատեսում է ներառել ՀՀ սահմանամերձ Սյունիքի մարզի Կապան և ՀՀ Շիրակի մարզի Գյումրի քաղաքների ու հարակից գյուղերի 3-9-րդ դասարաններում սովորող այն մասնակիցներին, ովքեր հանդիսանում են՝
Զոհված կամ հաշմանդամ դարձած պաշտպանի զավակ։
Զոհված կամ հաշմանդամ դարձած պաշտպանի քույր/եղբայր։
Երեք և ավելի երեխաներ ունեցող ընտանիքի զավակ։
Միակողմանի ծնողազուրկ կամ ծնողներից մեկի խնամքի տակ գտնվող երեխա։
2020 թ․ պատերազմի արդյունքում Արցախից տեղահանված ընտանիքի զավակ։
Ինչպե՞ս են ընտրվելու մասնակիցները։
Մասնակիցների ընտրությունն իրականացվում է երկու ձևաչափով։ Առաջին ձևաչափով հիմնադրամի էլ․ հասցեին են ուղարկվում նշված բնակավայրերի դպրոցների տնօրենների պաշտոնական գրությունները, որոնցում նշված են լինում մասնակցության ցանկություն արտահայտած աշակերտների տվյալները։ Երկրորդ ձևաչափով աշակերտների ծնողները կարող են ինքնուրույն լրացնել իրենց երեխայի մասնակցության էլեկտրոնային հարցարանը։
Երկու դեպքում էլ հիմնադրամի [email protected] պաշտոնական էլ․ հասցեին անհրաժեշտ է ուղարկել մի շարք փաստաթղթերի սքան տարբերակներ՝ ըստ մասնակցի մասնակցության կարգավիճակի՝
մասնակից երեխայի ծննդական,
ծնողի/ների անձնագրերի կամ ն․ք․-ների երկու էջերը,
ծնողների ամուսնության վկայական,
ռազմական գործողությունների ժամանակ զոհված կամ հաշմանդամ դարձած ծնողի կամ հարազատ եղբոր սույն կարգավիճակը փաստող տեղեկանք,
միակողմանի ծնողազուրկ երեխայի կարգավիճակի մասին տեղեկանք,
երեք և ավելի երեխա ունեցող ընտանիքի կարգավիճակի մասին տեղեկանք,
2020 թ․ պատերազմի արդյունքում Արցախից տեղահանված ընտանքի մասին տեղեկանք։
Մասնակիցների վերջնական թիվը սահմանափակ է։ Ուստի, անհրաժեշտ է, որպեսզի մասնակցության դիմումը կատարվի մինչև՝
Կապանի և հարակից գյուղերի համար՝ հուլիսի 30-ը,
Գյումրու և հարակից գյուղերի համար՝ օգոստոսի 10-ը։
Տնօրենների գրություններից, էլեկտրոնային հարցարանի և պահանջված փաստաթղթերի ուսումնասիրությունից հետո հիմնադրամի կողմից ընտրվում են պահանջներին առավելապես բավարարող մասնակիցները։ Այդ մասին դպրոցների տնօրենները և/կամ մասնակիցների ծնողները տեղեկացվում են էլ․ հասցեներին ուղարկված նամակների կամ հեռախոսազանգերի միջոցով։
Ինչպե՞ս է ընթանալու սեմինարը։
Դասերը ընթանալու են՝
Կապանում օգոստոսի առաջին շաբաթից սկսած մինչև 8 օր, Կապանի արվեստի դպրոցում։
Գյումրիում օգոստոսի երրորդ շաբաթից սկսած մինչև 8 օր, Գյումրու Մանկապատանեկան արվեստի պալատում։
Մասնակիցները սովորելու են՝
ազգային երգ, պար, նկարչություն, թատերական խաղ։
Մասնակիցները հիմնադրամի կողմից ստանալու են՝
նկարչական պարագաներ։
Մասնակիցները պետք է պարի դասերի համար ունենան իրենց հետ՝
համապատասխան սպորտային համազգեստ,
մասիկներ։
